Madagate.com le premier portail d'information et d'analyse politique de Madagascar

Nandray ny asany ireo mpiandraikitra foibe vaovao

Nosantarina tamin’ny alalan’ny fivoahana an-tsaha ny asabotsy 4 jona teo, teny amin’ny Espace Tsararivotra, Vontovorona, ny fandraisan’ireo mpikambana vaovao hitantana ny Foiben’ny Kiadin’i Madagasikara (Kim), tarihin’ny Filoha iombonana vaovao, Raharison Lala (Chef Baloo) sy ireo Filoha mpanampy Tantely sy Lapata, izay vao notendren’ny Komity Lehibe (KL).

« Naman’ny Rehetra ary Rahalahin’ny Kiady Rehetra », lalàna fahefatra ao amin’ny fototra ijoroan’ny skotisma no filamatra sy teny baiko noraisin’izy ireo hitondrana ny andraikiny. Fiofanana, Fifaninanana Teknika, Lasy ary ny andraikitra lehibe iantsorohan’izy ireo ny fanomanana ny Fivoriam-be ho an’ny Fikambanana amin’ny Taona ho avy.

Fanomanana ny fivoriamben’ny Faritany Antananarivo kosa ny amin’ity taona ity. Nanotrona ny fotoana ireo sampana rehetra (Sampana Mavo, Sampana Maitso, Sampana Mena) sy ireo mpiandraikitra avy amin’ireo Fivondronana misy eto Antananarivo, ao amin’ny Kim eto amin’ny Faritra Analamanga, Faritanin’Antananarivo, niaraka tamin’ireo solontenan’ny Komity Lehibe, Chef Rikki sy Chef Dragon. Nilaza rahateo ireo Komity Lehibe fa tena zava-dehibe ny fihaonana toy izao ary nahafaly azy ireo ny Lohahevitra noraisina tamin’ity fotoana ity izay voalaza etsy aloha.

Tamin’izany no nampandraisany anjara ireo ankizy hanazava ny fahazoana io lohahevitra io sy ny fampiharana azy. Noraisina ho teny baiko sy filamatra amin’ny fanohizana ny andraikitra mihitsy ity Lalàna fahefatra ao amin’ny fototra ijoroan’ny Skotisma ity.

Nampita ny vaovao ho any madagate.com : Zoelson Randrianindrina