Madagate.com le premier portail d'information et d'analyse politique de Madagascar

Ny Rado Rafalimanana izay ho lasa "Ra-Tezitra tsy Manana" raha mbola mitohy izao fandaozana azy izao

 

FANAMBARANA

Rehefa nivory ny Birao nasionaly ny antoko politika Gasy Manan-karena ny Tanjona na G M T, dia mamoaka izao fanambarana manaraka izao :

1°) Atsahatra tsy misy atak’andro ny fiaraha-miasa sy ny fanohanana ny kandida Ny Rado RAFALIMANANA, ary ny fikambanana fanahy maha-olona izay tarihiny amin’ny fifidianana izay ho filohan’ny repoblika noho ny tsy fanajany ny fifanarahana sy ny tsy fitoviam-pijery intsony manoloana ny toe-draharaham-pirenena misy eo aminy sy ny antoko G M T.

Ka ny mpikambana GMT izay minia mandika izany dia handraisana fepetra ny fanesorana azy ato amin’ny antoko.

2°) Tsy mankasitraka ary manameloka ireo rehetra mamolavola tetika maty paika hampiadiana ny samy Malagasy, na hery avy any ivelany na eto antoerana.

3°) Manainga ny Malagasy tsy vaky volo, indrindra ireo mpanao politika mba hitandro hatrany ny fiandrianam-pirenena, ka mba hanaja ny soatovina maha Malagasy.

4°) Ny antoko Gasy Manan-karena ny Tanjona na ny G M T dia mampiseho hatrany ny fahavononany ny handray anjara feno amin’ny fifidianana solombavambahoaka ho avy izao.

5°) Manaja tanteraka ny demokrasia, ka tsy miombon-kevitra amin’ireo izay tia hanankana ny filatsahan-kofidin-dRamatoa Lalao RAVALOMANANA , Didier RATSIRAKA, Andry RAJOELINA, fa mamela malalaka kosa ny vahoaka malagasy hisafidy ny olona tiany hitondra ny fireneny.

Natao androany faha 16 Jolay taona 2013

Manao Sonia ny fanambarana ny Filoha nasionaly G M T

Mamy ANDRIANTSITOHAINA