Madagate.com le premier portail d'information et d'analyse politique de Madagascar

 

 

* * * * * * *

Ny « Conférence des Nations unies sur le Commerce et le Développement » (CNUCED) na Konferansin’ny Firenena Mikambana momban’ny Varotra sy ny Fampandrosoana, dia sampana iray ao amin’ny Fivoriam-ben’ny Firenena Mikambana nitsangana ny 30 Desambra 1964. Ny antom-pisiana dia ny hampiditra ireo firenena an-dàlam-pandrosoana mba andray anjara ao anatin’ny tontolo ekonomika maneran-tany. Izany dia mba hafahan’ireo firenena ireo hanatsara ny fivoarany.

Madagasikara moa dia ny 20 septambra 1960 no niditra mpikambana ao amin’ny Firenena Mikambana. Izany hoe mpikambana tanteraka ao amin’ny CNUCED izy efa tamin’ny andron’ny Filoha Philibert Tsiranana.

Fiaraha-miasa ara-teknika no tena sahanin’ny CNUCED tam-boalohany mba hanampiana ireo firenena an-dalam-pandrosoana hiditra amin'ny toekarena manerantany amin'ny fanamorana ny fandraisan'izy ireo anjara mahomby amin'ity farany, indrindra amin'ny resaka varotra, fitantanam-bola ary fampahalalam-baovao.

Ity taona 2024 ity izany dia manamarika ny faha-60 taonan’ny CNUCED (1964-2024). Ao anatin’izany fankalazana izany no nanovana ny « logo »-ny UNCTAD (« United Nations Conference on Trade and Development » na « Conférence des Nations Unies pour le Commerce et le Développement » amin’ny teny frantsay, izay lasa « ONU Commerce et Développement », ny 09 Avrily 2024. Ny Sekretera jeneraliny, Ramatoa Rebeca Gryspan no nampiseho izany « logo » vaovao izany, tao Genève, Suisse, Foiben’ny UNCTAD sy toerana hankalazana ny faha-60 taonany ny 12 hatramin’ny 14 Jona 2024.

Isan’ireo Filoham-pirenena telo nahazo fanasana manokana, ny filoha Andry Rajoelina sy Ramatoa vadiny. Ny Filohan'ny Comores, Azali Assoumani, sy Togo, Faure Gnassingbé, no Filoham-pirenena roa hafa voaasa.

Tsiahivina fa Ramatoa Rebeca Grynspan Mayufis dia teratany avy ao Costa Rica, ao Amerika afovoany, ary ny 13 Septambra 2021 izy no voatendry ho Sekretera jeneralin’ny UNCTAD. Izy no vehivavy voalohany, ao amin’ny Tantara io sampanan’ny Firenena Mikambana io, no misahana izany toerana Sekretera jeneraly izany.

Jeannot Ramambazafy