VOLANA RAMADANY : NY VAVAKA ATAO ISAN-TOKATRANO TSIRAIRAY, DIA SAMY ATAO HO FANILON'NY HO AVY ETY AN-TANY . TAHAKA NY FAMAROAN'NY FANILO NY KINTANA ENY AN-DANITRA
Tsy toy ny isan-taona izay efa nahazatra hatramin'izay ny iray volan'ny Ramadany fifehezana ho an'ny mpino silamo saika maneran-tany. Anisan'izany mpino silamo eto Madagasikara. Ny antony dia noho ny fisian'ny Covid-19 izay mbola iadiana mafy ny handresena azy. Noho ny mbola tsy fahitana ny volana, ny Alakamisy 23 Aprily dia nofenoina ny Zoma 24 Aprily ny 30 andro ny Shaban, ka ny Sabotsy 25 Aprily 2020 no manomboka ny iray volana ny Ramadany.
Ny UMMI (“Union des Mouballihs Malagasy Ithma anashari”) etsy Ankasina dia naneho ny fiarahabana ireo mpino silamo rehetra noho izay fahatongavan'ny Ramadany izay, ary nirary ny fahavitan'izany hatramin'ny farany, ao anatin'ny fivavahana, mba handresena ihany koa ny corona viriosy.
Natofa Rijaly Jean Bel, Filohan'ny UMMI Madagasikara
Raha lazaina teny fohy ny fifehezana dia fanaovana Ramadany na fifadin-kanina, fitazoman-tena atao ho an' I Tompo Zanahary, ny tsy hanao zavatra voafetra mandritra ny fotoana voafetra. Ary izany dia adidy fanompoana izay nandidian'Andriamanitra ny mpino silamo rehetra. Raha toa ka nisy fotoam-pivavahana iraisan'ny mpino silamo rehetra isan'andro mandritra ny iray volana, dia tsy nasiana izany ho an'ny eo anivon'ny UMMI ho fampiharana ny fepetra efa noraisin'ny mpitondra mba tsy hisian'ny fiparitahan'ity Covid-19 ity, araka ny fanazavana nomen'ny Filohan'ny UMMI Madagasikara, Natofa Rijaly Jean Bel.
Noho izany dia isan-tokatrano no hanatanterahin'ireo mpino ny vavaka ao anatin'ny fotoana efa voafaritra mandritra ny iray volan'ny Ramadany. Tsy hijanona fotsiny amin'ny fangatahim-pitahiana ny vavaka atao fa eo koa ny vavaka handresena ity areti-mandoza mihatra maneran-tany ity.
Ho an'ny mpino silamo dia resy lahatra tanteraka no sady mino fa ho ringana io aretina io. Ny tokan-trano tsirairay dia samy atao ho fanilon'ny ho avy ety an-tany, tahaka ny fahamaroan'ny fanilon'ny kintana eny an-danitra.
Â
Soratra sy Sary Andry Rakotonirainy