Ny soa atao ilevenam-bola. Ary rehefa manao izany soa izany, tsy asiana dokam-barotra sy sehoseho fa avy hatrany dia tontosaina.
Misy ary tanora malagasy mandranto fianarana any ampitan-dranomasina any nitady hevitra hanampiana ireo mpianatra ao amin’ny faritra nipetrahany fony izy mbola teto Madagasikara. Ary dia niasa mangina izy tany Andafy tany nanangona boky. Tsy ary vaovao daholo ireo boky ireo. Ary marina fa amin’ny teny vahiny. Ny sary anefa manambara zavatra maro. Ary boky fianarana sy fialà na voly izy rehetra.
Ny tanjony mantsy dia mba hiverenen’ireo zanaka malagasy mamaky boky mian-dà lana. Tsy ho mora izany fa mila fahazarana. Ny 17 Marsa 2016 ary dia tonga ny fotoana lehibe nizarana ny ampahany ireo boky avy any am-pita ireo. Ka ny sekoly Md Augustin ao Anosibe, eo ampitan'ny tsena no misy azy, ao anatin'ny faritry ny fiangonana Md Jérôme ao Anosibe Antananarivo ihany.
Nandefasako mail moa io tanora io nampilaza fa tontosa amim-pomba tsotra dia tsotra ny fizarana ireo boky, ka izao ny valiny :
« Ny hafalian'reo mpianatra sy mpampianatra mahazo reo boky dia efa mitondra hafaliana be ho ahy ihany koa aty. Na dia tsy nianatra tao aza aho dia teo ny fanabeazan'ny ray aman-dreny, teo ny teny filamatra nitaizana anay tao amin'ny Masina Misely Amparibe hoe « Miorim-paka hanasoa olona » ka na aty aza dia mahatsiaro mandrakariva ny any ary mamita ny adidy ».
Anjaranay eto aminy madagate.org kosa ny manome fahatsiarovana ho an’ny Tantara e! Ny anaran’ilay tanora nahatsiaro ary mahatsiaro ireo mpiray tanindrazana aminy? Andrianjafiarimanana Rindra, mbola nanampy hoe: « Tsy voatery eo amin’ny fitondrana, ary tsy voatery manao politika vao afaka manampy ny Malagasy toa ahy, ary harena sarobidy ny fiaranana », hoy izy. Tsapany koa fa efa nanjavona efa ela izany hoe "bibliothèque scolaire" izany eto Madagasikara. Isaorana manokana ihany koa ny fikambanana « Livres Sans Frontières », nanamora ny fandefasana ireo boky saro-bidy eo amin’ny lafin’ny haren-tsaina.
Ireo ary ny sary tamin’iny 17 Marsa 2016 tao Anosibe. Ny vidéos dia hanaraka eo ihany. Fa deraina ity tanora ity. Maro ny zanaka malagasy mandrato fianarana any ampita. Fa maro ireo manadino, na ny tenin-drazany aza…
Jeannot Ramambazafy – Harilala Randrianarison – Haja Randria
Anosibe, 17 Marsa 2016
